وااااااأسفي على نفسي~~~تدحرجها الساحره المستديره~~~ نقاش

خير كلامي... سلامي...

وأول مقالي... لسان حالي يقول وصفي:

مابين... وبين...

كأني كرة تتدحرج بين القدمين...

هذي حالي تسيرها لعبه!!! كان حلمي كأي بنت بهالدنيا تحلم بالفارس
اللي ياخذها على فرس أبيض
والحمد لله جاني الفارس
بس......
طلع مافيه من الفروسيه الا اسمها
ولا فيه من الرجوله الا شكلها

زوج ماأعتمد عليه واذا صادفني موقف ما ألاقي رجال يحميني
يعني على ما قال القايل:
أسد عليً وفي الحروب نعامةٌ

يعني مختلفين لأبعد درجه
بالتفكير والاسلوب والاهتمامات ...حتى أبسط العادت اليوميه مانلتقي فيها
همه بذا الدنيا بلوت وكوره
واذا تناقشنا رفع صوته لأتفه الأسباب
واللي يغيض أكثر إنه برا البيت مزوح ودمه خفيف ولا يزعل من أحد
بس بالبيت يطلع الوجه الثاني
دايم معصب ولايتحمل العيال وكأننا أغراب
يدخل المجلس ويشغل التلفزيون(طبعا قناة رياضيه)

وهذي حياتنا
بتقولون ليش الرجال اذا دخل البيت تغير أكيد هالحرمه منكده عليه؟!!

بس أقول(ولا أمدح نفسي)اني انسانه عشريه وراعية نكته وبشهادة اهله بعد
لكن كثر الفوارق اللي بيننا في كل شي...وخاصه طريقته الغلط في تربية الاولاد وأهمها تعليمهم العادات السيئه..كل هذا مع الزمن خلانا بعاد عن بعض..
نرجع لموضوعنا الاساسي

في البدايه موضوع الكوره والتشجيع المبالغ فيه والصراخ كان يرعبني
بس تعودت عليه مع الوقت
لكن مو هذي القضيه...

أول الامر اذا كان بتجي مباراة يخليني أنام عند أهلي
ومع الوقت وكبروا العيال صار من الصعب قولت:
يالله نومي عند أهلس

بس المشكله اللي ما توقعتها
إن الكوره تصير كابوس بحياتي وصار مشهد المباراة يجيب لي غثيان
وكأني وحده تتوحم!!!
صار الزوج الحبيب اذا جت مباراة وانهزم الفريق اللي يشجعه قامت القيامه...
وقام يصارخ على العيال وعلي وما يتحمل أي كلمه حتى لو ماوجهت الكلام له
ويقعد زعلان وعلى ذا الحال يومين أو ثلاث...
عاد أنتم عارفين إن مبارياتنا أكثر منالهم عالقلب...
يعني مايمدينا نشم نفسنا والرجال يهدا كم يوم إلا وجت مباراة ثانيه وعفستنا...
ومن القراده لنا فتره والأنديه اللي يشجعها دايم تخسر....
الخلاصه..

ان بعض الرجال يضنون ان الزواج مجرد أجار بيت ومصرف
ما يفهمون ان الزواج تفاهم..وتربيه..ومسؤليه..

هذي حالتي باختصار وما أبي أطول عليكم
بس حبيت أشارك بهالموضوع وأوصل مسج لكل من يقرا موضوعي
وخاصه الرجال منهم المتزوجين واللي بعد ما تزوجوا...

بنات النساء أمانه واذا كنت مو قد الامانه ولا انت قادر تحافظ عليها
لا تاخذها وخلها معززه مكرمه في بيت أهلها

والشي الثاني الزواج مو لعب ووناسه وبس...لا
الزواج مسؤليه وأجيال لازم تعرف وشلون تربيهم قبل لا تجيبهم لذا الدنيا
فإذا كان في تربيتك خلل فحاول انك تعالجه قبل لا تربي غيرك

وأنا أؤمن بالمقوله اللي تقول:
(كل إناءٍ بما فيه ينضح)

وأتمنى كلامي يكون خفيف عليكم
وأدعو لي ربي يثبتني


تحياتي لكم

منقول للفائده